នាយករដ្ឋមន្ត្រីកម្ពុជាលើកតម្កើងគំរូសហគ្រិនភាពប្រកបដោយចីរភាព

ថ្លែងទៅកាន់ថ្នាក់ដឹកនាំសហគ្រាសធុនតូច និងមធ្យម ក្នុងឱកាសជួបសំណេះសំណាលជាមួយសហគ្រាសធុនតូច និងមធ្យម (SMEs) កាល​ពីពេល​ថ្មីៗនេះ​ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហោះសារមួយលើទំព័រ Facebook ផ្លូវការរបស់សម្ដេច អំពីសកម្មភាពរបស់រាជរដ្ឋាភិបាលក្នុងការគាំទ្រសហគ្រាសធុនតូច និងមធ្យម។ សារនោះត្រូវបានអមដោយរូបថតមួយដែលសម្ដេចកំពុងទស្សនា​ស្តង់ពិព័រណ៍ផលិតផលរបស់ក្រុមហ៊ុនខនហ្វីរេល (Confirel)។

តាមរយៈការជ្រើសរើសរូបភាពនេះ សម្ដេចបានផ្តល់​តម្លៃ​ដ៏​ខ្ពង់​ខ្ពស់​ដល់​ក្រុមហ៊ុន Confirel ដែលចាប់តាំងពីថ្ងៃបង្កើតមក បានប្តេជ្ញាចិត្តលើការបង្កើនតម្លៃបន្ថែម​ទៅ​ដល់​ផលិតផលខ្មែរពិតប្រាកដ ដោយផ្អែកលើគោលការណ៍អភិវឌ្ឍន៍ប្រកបដោយចីរភាព សេដ្ឋកិច្ចវិលជុំ (Circular Economy) និងការចូលរួមរបស់សហគមន៍ជនបទ។

ដោយស្មោះត្រង់ចំពោះទស្សនវិជ្ជានេះ ក្រុមហ៊ុនបានកែច្នៃផលិតផលកសិកម្មក្នុងស្រុកជា​ច្រើ​ន​ឱ្យ​ទៅជាផលិតផលដែលមានតម្លៃបន្ថែមខ្ពស់ ទទួលបានវិញ្ញាបនបត្រសរីរាង្គ (Organic Certification) និងអនុលោមតាមស្តង់ដារអន្តរជាតិ ដែលអនុញ្ញាតឱ្យផលិតផលរបស់ខ្លួនចូលទៅកាន់ទីផ្សារលំដាប់ខ្ពស់ ដោយ​ធានាបាននូវតម្លៃសមរម្យ និងយុត្តិធម៌សម្រាប់កសិករដៃគូ។

តាមរយៈការចូលរួមក្នុងការរៀបចំ និងពង្រឹងខ្សែសង្វាក់តម្លៃជាមួយ​នឹង​ផលិត​ករនៅជនបទ Confirel មិនត្រឹមតែធានានូវ​គុណភាព និងការតាមដានប្រភពដើមនៃផលិតផលប៉ុណ្ណោះទេ ប៉ុន្តែថែមទាំងធានាការបែងចែកតម្លៃដោយសមធម៌នៅគ្រប់ដំណាក់កាលនៃខ្សែសង្វាក់ផលិតកម្ម ចាប់ពីកសិដ្ឋានរហូតដល់អ្នកប្រើប្រាស់ចុងក្រោយ។

សព្វថ្ងៃ គំរូអភិវឌ្ឍន៍នេះត្រូវបានស្ថាប័នអន្តរជាតិជាច្រើនលើកសរសើរ និងចាត់ទុកថា ជាគំរូល្អមួយដោយ​ផ្អែកទៅ​លើ​ការ​អភិវឌ្ឍប្រកបដោយចីរភាព និងទំនួលខុសត្រូវសង្គមរបស់ក្រុមហ៊ុន។

ការបង្ហាញផលិតផលរបស់ Confirel ក្នុងរូបថតដែលសម្ដេចនាយករដ្ឋមន្ត្រីបានចែករំលែកនៅតាម​បណ្តាញ​សង្គម​ ក៏បានរួមចំណែកដល់​ការ​លើកស្ទួយមុខមាត់កម្ពុជាថាជាប្រទេសដែលពឹងផ្អែកលើធនធានធម្មជាតិ និងចំណេះដឹងបែប​បុរាណរបស់ខ្លួន ដើម្បីកសាងសេដ្ឋកិច្ចទំនើប ប្រកបដោយនវានុវត្តន៍ និងការទទួលខុសត្រូវ។

រូបភាពនេះក៏ផ្ទុយពីការយល់ឃើញអវិជ្ជមានដែលត្រូវបានគេ​ភ្ជាប់ប្រទេស​កម្ពុជាទៅ​នឹង​មជ្ឈមណ្ឌលឆបោកតាមអនឡាញ តែវា​បាន​បញ្ជាក់ច្បាស់​ថា ប្រទេសកម្ពុជាមានសហគ្រាសធុនតូច និងមធ្យមគំរូជាច្រើន​ ដែលតំណាងនៃសេដ្ឋកិច្ចដោយ​ផ្អែកលើផលិត​ផល​ប្រកប​ដោយ​គុណភាព តម្លាភាព និងចីរភាព។

ក្រុមហ៊ុន PPM–Confirel ចាត់ទុកការជ្រើសរើសរូបភាពនេះថា ​ជាការលើកទឹកចិត្តដ៏មានតម្លៃបំផុត​មួយចំពោះសហគ្រិនខ្មែរជំនាន់ថ្មី និងជាការអំពាវនាវឱ្យសហគ្រាស​ក្នុង​ស្រុក​យកគំរូតាម Confirel ដោយចាប់ផ្តើមពីផលិតផលក្នុងស្រុករបស់ខ្មែរ វិនិយោគលើនវានុវត្តន៍ អនុវត្តគោលការណ៍សេដ្ឋកិច្ចវិលជុំ និងឆ្ពោះទៅរកស្តង់ដារអន្តរជាតិ ដើម្បីកសាងសហគ្រាសមួយ​ដែលរួមចំណែកដល់វិបុលភាពរបស់ប្រទេស គោរពសិទ្ធិ​មនុស្ស ធម្មជាតិ និងអត្តសញ្ញាណរបស់កម្ពុជា៕